ប៉ៃលិន៖ ភ្ញៀវទេសចរណ៍ទៅលេងខេត្តប៉ៃលិននៅក្នុងអំឡុងពិធីបុណ្យភ្ជុំបិណ្ឌចំនួន ៣ថ្ងៃនេះមានប្រមាណជាង ២៥០០នាក់ ដែលធ្លាក់ចុះប្រមាណជា ៨៣,៩៦%។
ប្រធានមន្ទីរទេសចរណ៍ខេត្តប៉ៃលិន លោក លឹម វាសនា បានឱ្យដឹងថានាឱកាសបុណ្យភ្ជុំបិណ្ឌ រយៈពេល ៣ថ្ងៃគិតចាប់ពីថ្ងៃទី០៥ដល់ថ្ងៃទី០៧ ខែតុលា ឆ្នាំ២០២១នេះ ភ្ញៀវទេសចរជាតិ ដែលបានដើរលេងកម្សាន្តនៅតាមរមណីយដ្ឋាននានាក្នុងខេត្តប៉ៃលិនសរុបមានចំនួន ២ ៥២៩នាក់ ដែលថយចុះពី ១៥ ៧៦៩នាក់ក្នុងឆ្នាំ២០២០។
លោកបន្តទៀតថា ពុំមានភ្ញៀវទេសចរអន្តរជាតិចូលមកលេងក្នុងខេត្តនោះទេ ដោយសារបញ្ហាជំងឺកូវីដ-១៩។
កាលពីថ្ងៃទី ២៤ ខែកញ្ញា រាជរដ្ឋាភិបាលកម្ពុជាសម្រេចផ្អាកពិធីបុណ្យកាន់បិណ្ឌ និងភ្ជុំបិណ្ឌឆ្នាំ២០២១ តែរក្សាថ្ងៃឈប់សម្រាក៣ថ្ងៃនៃពិធីនេះដដែលដើម្បីឱ្យប្រជាពលរដ្ឋមានពេលសម្រាកពីការងារ បានដើរកំសាន្តខ្លះ តែជាមួយគ្នានោះក៏ស្នើឱ្យពលរដ្ឋចូលរួមគោរពឱ្យបាននូវវិធានការសុខាភិបាល ទាំងអស់គ្នាផងដែរ។
ថ្ងៃសម្រាកក្នុងពិធីបុណ្យភ្ជុំបិណ្ឌឆ្នាំនេះត្រូវធ្វើឡើងនៅថ្ងៃទី ៥,៦ និង៧ ខែតុលា ឆ្នាំ២០២១៕
